【有片】超級No-Look!好掛住你呀細哨!

2019年10月19日 13:28
東網電視
更多新聞短片
(互聯網)
早前華基爾雲迪積克攞歐洲最佳球員時,話過自己偶像唔係巴里斯、簡拿華路,而係森巴巨星朗拿甸奴,其實都唔意外嘅,其實有邊個球迷唔鍾意細哨?呢位05年金球獎得主,打法極具娛樂性,睇佢踢波絕對係享受。剛啱佢為一場慈善賽上陣,就送出個妙到毫巔嘅No-Look助攻,瀟灑到你唔信。
朗拿甸奴呢次去到哥倫比亞踢慈善賽,着起件紅色波衫勁Sharp醒,雖然身型有啲發福,但狀態依然唔錯,舉手投足極有巨星風範。一次佢離開超過30碼外攞到波,雖然前面守衞企到密密麻麻,但佢依然搵到個靚位,右腳整個直線No-Look妙傳,個波足足穿過6個敵衞去到隊友腳下,面對大大個龍門輕鬆射入。雖然只係慈善賽,但呢腳傳送堅有卡士,時間、力度、眼界、技術、足球智慧,五大要素缺一不可,去到39歲仲有大把貨,球迷真係好掛住你呀細哨!
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。
相關新聞