19歲歐聯超神人!揀加盟曼城為父報仇

20191024
東網電視
更多新聞短片
(法新社圖片/互聯網)
周四(24日)凌晨歐聯E組,薩爾斯堡雖然主場2:3不敵拿玻里,但陣中19歲新星夏蘭特梅開二度,成為歐聯史上第一位於首3場分組賽入到6球嘅球員,強如兩大球王美斯同C朗都做唔到。
呢位挪威國腳首場對亨克,上演帽子戲法,之後對利物浦亦有1球進帳,加埋今場入2球,超越車路士名宿杜奧巴,成為歐聯史上首3場分組賽入波最多球員,同時亦喺今屆歐聯射手榜,力壓拜仁慕尼黑前鋒羅拔利雲度夫斯基,升上第1位。
夏蘭特上季由挪超莫迪加盟奧地利勁旅薩爾斯堡,當時表現平平無奇,但今季突然大爆發,為球隊於各項賽事上陣21次轟入18球。最令人驚喜係踢最高水平嘅歐聯,都保持超高入球率。
呢位身高1米94嘅「怪物」被指踢法似瑞典神鋒伊巴謙莫域,已引起各大豪門注意,早前有傳曼聯計劃羅致佢,因為領隊蘇斯克查執教莫迪期間,一手提拔當年只有16歲嘅夏蘭特上一隊,非常欣賞呢位超新星,自然希望帶佢成「魔」。
不過,夏蘭特嘅爸爸係前曼城球員恩治夏蘭特,2001年曼市打吡,前曼聯隊長堅尼用「收山腳」重創恩治夏蘭特,搞到佢提早掛靴,「老夏」亦承認非常憎恨紅魔鬼。
加上近日流出一張相片,就係夏蘭特10年前着住曼城波衫,同埋自己上載當年爸爸同韋亞喺曼城比賽嘅相,話兩人係英雄,擺明要繼承父親衣缽,將來加盟曼城為父報仇。據悉,曼城亦好想簽入呢位名將之後,睇來呢位新世代超級神鋒入「城」指日可待。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。