艾美利死攬炸彈　遲早累死阿仙奴

阿仙奴於歐霸驚險反勝甘馬雷斯，天價新將尼高拉斯比比，連入2個靚罰球當然抵讚，但中場美蘭尼爾斯今仗派膠派到離晒大譜，累球隊再次落後，廠迷見到就火滾。呢位22歲小將被受主帥艾美利重用，但本季已多次犯錯、令球隊陷入劣勢，艾帥若未能吸收教訓繼續死攬佢，阿仙奴遲早出事。

美蘭尼爾斯今仗被安排打右翼，但佢有破壞冇建設，其中37分鐘佢返到中場攞波，點知一控就甩腳，畀對手輕易偷得皮球、於2名中堅中間大步推進後勁射中柱，般奴杜亞迪再近門執雞成功，令阿仙奴第2次落後。

今場阿仙奴發揮本身已經麻麻，好難先追成平手，美蘭尼爾斯今次犯錯對球隊打擊好大，艾帥都忍唔住半場就換走佢。美蘭尼爾斯於艾帥麾下已多次獲得上陣機會，但呢次於中場附近魯莽失控球，簡直係小學雞式錯誤，以阿仙奴嘅人腳水準，美蘭尼爾斯堅係唔合格。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。