那些年 同亨利嘈交的中堅賓

2019年11月02日 19:15
東網電視
更多新聞短片
(Getty Images)
可能係球壇史上其中一個最具自信球員——「中堅賓」賓特拿,呢位丹麥球星雖然只得31歲,但今季返番家鄉球會哥本哈根效力,結果坐多過踢。近排相對得閒嘅佢仲出咗本自傳,其中部份有趣內容包括佢當年效力阿仙奴期間竟然逃學,仲有講到佢同「兵工廠」傳奇亨利點樣化敵為友,大讚亨利教佢好多嘢!
喺04年加盟阿仙奴嘅賓特拿,當年只得16歲嘅佢,仲要一星期上兩次堂,不過「中堅賓」都頂唔順,選擇逃學:「啲課程五花八門,例如壓力管理、金融管理,我認為我冇必要學,我好討厭上堂。有一日,我匿喺女廁逃學添!」賓特拿結果畀青訓主管捉到,但對方最後放過佢,畀佢繼續留喺「兵工廠」。
又有一次,雲格提升賓特拿去跟一隊操,然後,「中堅賓」竟然同亨利嘈起上嚟:「嗰次訓練係11對1,每個球員每次最多只可以2次觸球。然後,我見到亨利有次掂咗波3次,我咪大嗌『3次』,之後雲格個助手望一望我,示意我專心踢波,但亨利聽到之後,就向我做出收聲手勢,我咪向佢做番同樣動作囉!」
賓特拿之後仲同亨利嘈起上嚟:「我覺得我冇做錯,人人都要跟規矩。亨利叫我收聲,仲講咗啲唔好嘅嘢,我咪鬧番轉頭,仲話應該收聲係佢。之後亨利衝埋嚟講好多嘢,跟住連艾殊利高爾同蘇甘保都走埋嚟,叫我收聲去踢波,我咪唯有照做囉!」
不過,賓特拿之後補充,原來亨利係個大好人:「練完波之後,佢搵番我,我哋傾咗好耐。我都冇諗過佢會講咁多,畀咗好多建議我,內容好全面。我真係好榮幸,呢啲根本唔係佢必須要做嘅事,最後我哋大大力擁抱。」雖然年少成名,不過賓特拿依家效力緊哥本哈根,今季只出場過5次,仲要只有2次正選,未入過波同助攻,嚟緊年尾佢份合約到期,仲有冇班落都好難講囉!
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。