【賽後解碼】踢得又教得　林伯堅有料

今晚英超頭場上演倫敦打吡，車路士主場迎戰水晶宮，車仔雖有中場大頭腦佐真奴費路坐波監下，但主帥林柏特派出一個平均年齡只得24歲零88日嘅正選陣容，係隊史最年輕出戰英超嘅正選陣容，下半場憑「譚仔」譚美阿巴謙入楔快射得手，取得今季聯賽第10個士哥，加上「美國隊長」基斯甸普列錫頭槌錦上添花，連續3場英超有波入，協助車仔贏2比0，自2017年5月以來首次聯賽6連勝，弗到冇朋友。

車仔連場報捷，主帥林柏特功不可沒，憑住10月聯賽3連勝獲頒上月英超最佳領隊，而英超史上曾攞過每月最佳球員同領隊兩大獎項，只有皮雅斯、現任英格蘭主帥修夫基同今日嘅「林伯」，而「林伯」仲係近7年來首位取得英超6連勝嘅本土主帥。事實上，今季頭4輪聯賽僅1勝，林柏特能頂住咁大壓力，堅持畀機會譚美阿巴謙、美臣蒙特等新仔，絕對唔容易，依家踏入收成期，單係「譚仔」不斷入波已贏盡掌聲，又保住前列位置，IQ高達150嘅「林伯」臨危不亂，攞獎實至名歸。