車仔上次席 祖高爾同夏格維斯撐爭標

2019年11月10日 00:37
東網電視
更多新聞短片
(Getty Images)
車路士贏完水晶宮之後,家陣以12戰得26分升上次席,落後榜首利物浦5分,並以1分壓住第3位曼城,但就較呢兩隊打多1場。今次係「車仔」自2016/17奪標球季之後,首次喺英超取得6連勝,賽後包括舊將祖高爾同英格蘭名將夏格維斯都話睇好「車仔」有機會挑戰冠軍喎!
上咗電視台講波嘅夏格維斯話:「林柏特做晒所有正確決定,佢哋依家排第2,真係難以置信,尤其係佢哋失波係同紐卡素一樣多呀!進攻方面,佢哋真係冇得彈,如果佢哋執番好後防,就會有機會爭標。」
至於曾效力車路士嘅祖高爾就點名大讚韋利安:「佢哋真係爬到上去喇!簡直係神奇演出,半場時候我都仲有少少擔心,因為水晶宮真係守得唔錯,但當車路士一上齊彈藥,就搵到水晶宮缺口。韋利安今日表現真係勁,佢成季都咁堅,今日仲做埋隊長添,班後生都好好。車路士真係令人振奮,今季起起跌跌,依家上到第2位,試問開季時點會諗得到。林柏特唔會多謝我哋讚賞,佢會寧願低調啲囉!」
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。