【賽後解碼】熱刺連續3場被後追失分

2019年11月10日 01:18
東網電視
更多新聞短片
(法新社圖片)
有頭威、冇尾陣呀!英超勁旅熱刺今季喺聯賽表現低迷,尋晚佢哋喺主場迎戰錫菲聯,雖然憑孫興民喺58分鐘先開紀錄,可惜依然解決唔到尾段腳軟嘅陋習,結果畀客隊中場佐治巴鐸克嘅傳中波意外搞掂追和1比1完場,連續5場聯賽失分,排名仲跌到落第12位!
熱刺今場其實唔輸都好彩,錫菲聯上半場已曾攻門中柱。至於當「老孫」入波領先之後,錫菲聯本來轉個頭已經扳平,只係VAR及後因為入波之前一個爭議性疑似越位,將客隊前鋒麥哥迪克嘅入波判成無效。不過,錫軍喺完場前12分鐘,終於都憑佐治巴鐸克入波追和。值得一提,錫菲聯呢個入波同樣都係經過VAR判決,好彩係維持入波完判,先幫錫菲聯攞番1分,仲爬升到第5位添!
熱刺開季至今12戰只得3勝,近排最大問題係唔識埋尾。之前對愛華頓領先一球,打到補時7分鐘先失波,被逼和1比1。再上一輪作客利物浦,開波1分鐘就有哈利卡尼入波領先,點知打到最後又係被反勝2比1。加埋今場又係入波先都唔掂,熱刺再解決唔到呢個問題,除非可以贏得歐聯,否則下季隨時要同歐洲賽再見呀!
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。