【賽後解碼】崩潰!熱刺等平十年羞家紀錄

2019年11月10日 02:26
東網電視
更多新聞短片
(法新社)
熱刺喺英超繼續沉淪,主場對住升班球隊錫菲聯雖由孫興民先開紀錄,但最後被對手逼和1:1,若非靠VAR之助連1分都不保。熱刺本季英超曳到震,連埋今仗失分,已連續5場贏唔到,若下仗作客韋斯咸繼續不勝,將會追平11年羞家紀錄。
熱刺對上1次聯賽6戰不勝,要追溯到08年。當時由12月中開始,對曼聯、紐卡素、富咸、西布朗、韋根同樸茨茅夫都未能贏波;今季熱刺於10月頭開始,先後於白禮頓、屈福特、利物浦、愛華頓同錫菲聯腳下失分,下場去到韋斯咸主場都唔係易踢。韋斯咸其實都好沉,但熱刺近12場作客聯賽都冇贏過,對上一次贏波已係今年1月贏富咸,呢場要重返正軌唔易。另外,今場熱刺上半場竟然連一次中龍埋門都冇,係4月熱刺新球場開幕以來嘅首次;而對上一次已經係1月嘅事,當時熱刺係於溫布萊對曼聯。
經過多番失分之後,普捷天奴今戰鬥錫菲聯用上賓戴維斯、艾歷迪亞、達雲臣山齊士同奧利亞嘅4人防線,但表現認真麻麻,奧利亞已經係演出最好1個,但傳中成功率只2成。賓戴維斯亦於進攻上零貢獻,更累迪亞於2分鐘就攞黃牌。山齊士亦信心全失,多次畀對手扭過,但都冇迪亞咁曳,錫菲聯2次送個波入網,佢都需要負上全責,因為佢2次都冇緊身嘜住「入波」對手。熬刺後防千瘡百孔,領隊普捷天奴再諗唔到辦法改善,熱刺未來大把機會失分。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。