自評9分！久保健英入世界波創紀錄

堅呀！日本超新星久保健英尋晚帶領馬略卡主場以3比1打敗維拉利爾，今場呢位日本小將先係喺禁區扭過兩人再被踢跌，幫球隊搏到12碼，打開紀錄。之後去到53分鐘，佢又喺禁區外射入一腳世界波，幫馬略卡埋齋，鎖定3比1勝局。就憑呢個入波，久保健英以18歲159日成為西甲史上最年輕入波嘅亞洲球員，同時亦係5大聯賽史上最年輕入波日本球員。

賽後久保健英High爆咁話：「我實現咗自己最大夢想，但我仲要繼續努力。隨住比賽經驗累積，我嘅表現愈來愈好，想要入波就要嘗試射門，而我做到喇！帶住一場勝仗去國際賽日，令我好開心。我表現值幾多分？我想畀自己10分，但我錯過一次機會，所以只係值9分。」

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。