2手球冇判12碼 利物浦贏曼城哥帥怒吼

2019年11月11日 02:27
東網電視
更多新聞短片
英超冠軍前哨戰,利物浦主場戲劇性3:1殺敗曼城!今仗開波冇耐就高潮叠起,阿歷山大阿諾特禁區內手掂到波,球證冇判12碼,轉頭法賓奴泰華利斯射世界波打開紀錄。之後穆罕默德沙拿、沙迪奧文尼先後頂入,一度拉開比數至3:0,於貝拿度施華追番粒後,阿諾特再次於禁區內用手掂波,球證一樣冇畀12碼,嬲到哥迪奧拿向天大叫「2次、2次」,最終利物浦擊敗曼城,雙方分數差距已去到9分。
今場大戰氣氛濃厚,曼城雖然作客但一開波就反客為主,不斷於前場搶迫令紅軍球員畀個波都難,令安德魯羅拔臣掟界外球久久掟唔出,艾利臣比加亦畀對手逼到跣腳幾乎派膠。5分鐘就出現高潮,曼城進攻右路雙方一拍,個波掂到貝拿度施華隻手彈入禁區,阿古路一揚個波掂到阿歷山大阿諾特隻手,球證示意比賽繼續;利物浦反擊沙迪奧文尼左路出波,曼城勉強解圍,法賓奴泰華利斯遠射世界波入網。呢個時候VAR出場,如果判曼城得到12碼,法賓奴入波就會作廢,一來一回等於兩球;但最後球證冇判12碼,利物浦打開紀錄。
之後曼城狂攻,連續2個罰球斬入禁區勁有威脅,但史達寧頭槌頂斜,洛迪卡斯簡迪亦僅僅掂唔到個波未能追平。13分鐘紅軍快速反擊入多球,阿諾特於自己半場左腳傳靚波到左路,羅拔臣妙傳高波入禁區,穆罕默德沙拿趕到頂入,紅軍領先2:0,哥迪奧拿即時黑晒面。
曼城繼而壓住嚟踢,阿古路禁區內扣入中路右腳狂抽,艾利臣橫身撲出,之後於左路幾個靚組織,安祖利奴一射畀VVD閂到多少中柱彈出。利物浦之後攞番唔少攻勢,37分鐘阿諾特反擊引球去到禁區頂交橫,法明奴左腳勁抽被擋,完半場前法明奴交橫到禁區頂,沙拿第一時間左腳靚射,巴禾飛身撲出,半場主隊領先2球。
換邊後利物浦把握機會入多球,51分鐘佐敦軒達臣右路出個靚高波,沙迪奧文尼伏兵遠柱一頂,巴禾撲到都入,主隊贏到3:0。65分鐘史達寧殺落底線畀文尼同阿諾特夾擊跌到,球證冇判12碼。之後曼城不斷狂攻,其中阿古路門前踢空氣最嘥。78分鐘曼城左路地波傳中,貝拿度施華遠柱左腳射近柱入網追番球。
83分鐘史達寧入到禁區傳中又打中阿諾特隻手,球證再次唔畀12碼,哥迪奧拿場邊激動大叫「2次、2次」,更疑似同現場利迷嘈交。最後利物浦頂得住曼城狂攻贏3:1完場,利物浦12仗11勝1和,曼城則輸到本季第3場,落後紅軍9分僅排第4。