「美斯唔係正常人」 VVD輸得心服口服

2019年12月03日 10:12
東網電視
更多新聞短片
(法新社)
利物浦中堅華基爾雲迪積克,去到金球獎頒獎檯,始終都係不敵美斯僅得第2名。對VVD嚟講,一生可能只有一次挑戰機會,最後功敗垂成,但呢名荷蘭國家隊隊長並冇太唔開心,佢表示美斯唔係正常球員,對住「外星人」級數球王係佢唔好彩。
VVD剛度過夢幻賽季,帶領利物浦連續第2年殺入歐聯決賽,最後擊敗熱刺奪得隊史上第6座歐聯獎盃,之後佢亦以隊長身份,率領荷蘭打入歐國聯決賽,被公認為世界其中一位最佳後衞。早前佢亦成功殺敗美斯同C朗,奪得歐洲最佳球員。
去到金球獎頒獎禮,VVD帶同愛妻Rike Nooitgedagt出席,最終VVD眼白白睇住美斯,第6次獲頒金球獎。VVD表示:「唔好彩嘅係,呢個世界係有啲球員唔係正常,就好似美斯正正係『外星人』。6次奪得金球獎,你一定要尊重佢。我知自己今次係有得爭,同美斯好接近,呢次輸只係有別人比自己好些少。」
「老實講我一直都唔相信,自己係有份爭金球獎,直到提名名單公布我先信係事實,呢次肯定對我而言意義重大,真係好唔容易。我嘅職業生涯同美斯、C朗呢類天生勝利者好唔同,我係去到後期先至取得成績,但我冇放棄過夢想,每一日都好努力去圓夢。我會繼續努力,希望下一年可以繼續有機會去到呢個頒獎檯。」
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。