十年前拒麥巴比Selfie 杜奧巴台上找數!

2019年12月03日 13:00
東網電視
更多新聞短片
(法新社)
美斯第6度奪得金球獎,老實除非你係美斯球迷,唔係多數啦只會「哦」一聲算數。金球獎2019,C朗、穆罕默德沙拿、沙迪奧文尼等都冇出席,全晚亮點來自司儀杜奧巴。呢名車路士名宿大爆,10年前有個小朋友喺史丹福橋搵佢合照,但因該晚歐聯賽事被球證「屈出局」、心情太曳而拒絕,嗰個細路原來就係基利安麥巴比。杜奧巴決定於金球獎台上找數,仲搵全場球星做佈景板,令麥巴比笑到見牙唔見眼!
10年前歐聯4強次回合,車路士主場迎戰巴塞隆拿,主隊憑艾辛射入世界波領先,一直到93分鐘,恩尼斯達扳平協助巴塞戲劇性地以作客入球條例過關。球證奧維保該仗多次漏判12碼畀車仔,賽後杜奧巴嬲到爆狂鬧球證「F**king disgrace」,成就著名嘅「北京電視機」事件誕生。
杜奧巴喺金球獎頒獎台上話:「10年前有場波之後,一個細路行埋嚟想影相,嗰日我因為太嬲所以拒絕咗。原來嗰個小朋友係麥巴比,我希望依家找數。」杜奧巴隨即拎出手機,同麥巴比及女主持齊齊Selfie,杜奧巴仲叫一班台下球星起立齊齊影,氣氛勁正,可以話係全晚高潮。
原來10前,麥巴比去咗車路士交流,為車仔青年軍上陣對過查爾頓,被安排入場睇車仔對巴塞嘅歐聯賽事。
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。