【東體爭議】摩連奴要攬炒艾歷臣

20191203
東網電視
更多新聞短片
(Getty Images)
葡萄牙名帥摩連奴接掌熱刺之後即刻喺英超同歐聯打出3連勝,眨吓眼就將氣勢扭轉,前景好似一片光明。不過,今日就有個壞消息傳出,就係陣內中場大腦基斯甸艾歷臣決定唔續約,如果下月冇人畀錢買佢走,就會等到出年暑假免費走人。據聞一向注重軍紀嘅「寸王」已經決定棄用佢,打算將佢掟入雪櫃到季尾,費事眼冤呀!
根據《每日電訊報》報道,艾歷臣已經明顯表示唔會續約,即使熱刺已經用盡方法,包括向佢提供一份900萬歐元年薪嘅新約,甚至話會喺份約加入5,000萬歐元解約條款,呢位27歲球星都一於少理。按照規定,嚟緊1月1日開始,呢位丹麥球星就可以同任何球會商討下季加盟,之前就包括皇馬、祖雲達斯、國際米蘭同巴黎聖日耳門都同佢扯上過關係,堅係唔使憂。
同艾歷臣唔同,另外兩位同樣會喺今季尾約滿嘅守將艾達韋列特同維頓漢,據報都有意留隊,繼續跟摩帥搵食,而摩連奴一向作風強硬,艾歷臣如果傾唔掂數留隊,「寸王」一定唔會再重用佢。究竟係要保持大軍團結,寧願將有離心嘅球員雪到硬算數?定係趁佢仲喺球會用到佢盡、用到佢殘呢?真係好難講,不過「摩佬」依家就選擇放棄佢,又睇吓熱刺有摩連奴冇艾歷臣,係咪可以重返前列,展現返勁旅本色啦!
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。