巴塞必買阿蘇接班人　國米大佬打定輸數

蘇亞雷斯轉眼間已經32歲，巴塞已經講明會物色其接班人，早前體育總監艾比度承認，對國際米蘭阿根廷射手拿達路馬天尼斯有興趣。巴塞來勢洶洶，極可能1月就搶人，國米CEO莫拉達話會盡量留人，但亦承認依家轉會市場癲晒，暗示如果巴塞出天價的話，想留人都留唔住。

馬天尼斯本季大熟大勇，上場意甲個人省2粒，助國米贏波上榜首，依家已攻入8個聯賽入球，畀巴塞睇中都好正常。馬天尼斯已係阿根廷國腳，同美斯絕對有偈傾，巴塞睇嚟要決定搵馬天尼斯頂替阿蘇。

國米雖然本季大躍進，力足挑戰祖雲達斯意甲霸權，莫拉達表明會用盡一切留人，但未必可以成功：「馬天尼斯知道國米好需要佢，以我所知佢亦好喜歡國米。不過轉會市場已變得好難預料，另外都要睇球員意願，我哋係好想佢留低，留唔留到就話唔埋。」早前有傳若馬天尼斯離隊，國米將斥巨資收購阿仙奴隊長奧巴美揚頂替。

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。