阿甲神鋒變態 老婆「出賣色相」大控訴

20191204
東網電視
更多新聞短片
阿甲競賽會前鋒莊拿坦基斯達度唔知發乜神經,早幾日狂毆自己老婆,搞到佢老婆報完警之後,不惜「出賣色相」進行大控訴,半裸拍片擺上網展示傷勢,結果莊拿坦基斯達度梗係畀警察拉咗啦。
由視頻可見,28歲嘅Morella只着住胸圍底褲,自拍影勻全身展示傷勢,其中左邊顴骨最傷腫起晒,佢一面拍片一面描述被毆打嘅過程,包括點樣畀莊拿坦基斯達度喺地板拖行,Morella仲咁寸個衰佬:「睇睇我塊臉都腫晒,依家拍埋片,你唔係好喜歡拍片咩‧‧‧‧‧‧」
Dto. Rincón de Milberg警察總部嘅案情紀錄係咁寫嘅:「事主Morella喺Santa María de Las Conchas 4249住所內,被30歲現職競賽會足球員莊拿坦基斯達度一言不發突然毆打,造成輕微損傷,然後揚長而去。」Morella拍片自曝身材兼家醜,似乎係唔多滿意份口供紙,話佢傷勢輕微。
至於同Morella育有兩名子女嘅莊拿坦基斯達度,為乜唔聲唔聲打老婆一身,目前仲未搞清楚,但係佢已經初步被控傷害他人身體。
其實競賽會今季開個頭唔錯,目前喺聯賽榜排第5位,莊拿坦基斯達度亦入咗2球,樣樣嘢都好順吓,呢次佢自製一單官非,競賽會可能會畀佢害死。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。