泰利倒戈史丹福橋!佢食住林柏特

2019年12月04日 19:02
東網電視
更多新聞短片
(Getty Images)
周四(5日)凌晨英超除咗摩連奴率領熱刺,重返奧脫福球場,倒戈鬥曼聯之外,前車路士偉大隊長泰利亦會以阿士東維拉助教身份,重返成名地史丹福球場,倒戈鬥車仔。適逢車路士今季由林柏特執教,兩位車仔傳奇人物交鋒,令今場比賽別具意義。
泰利同林柏特屬於車仔王朝標誌性人物,兩人球員時代一齊為車路士捧過3次英超、4次英足盃、2次英聯盃、1次歐聯及1次歐霸盃軍。
雙方掛靴之後,仲一齊去到英冠搵食,林柏特執教打比郡,泰利出任阿士東維拉助教,最神奇係兩人不約而同,今季一齊登陸英超,今場仲可以正面交鋒。
林柏特對於泰利重返史丹福橋,認為對方有「主場之利」,因為佢一定可以獲得車迷英雄式歡迎:「泰利係車路士嘅偉大隊長,為球隊贏得一切重要冠軍,車路士球迷一定會歡迎佢返嚟,屆時場面應該會好溫馨,泰利將會獲得一個令人感動嘅時刻,佢值得擁有。」
雖然泰利同林柏特及車路士感情深厚,但依家各為其主,始終冇得留情,其實兩人喺上季英冠已經3次碰面,當時維拉常規賽兩循環分別以3:0及4:0大勝由林柏特領軍嘅打比郡,最後更加喺升班附加賽決賽,以2:1再次擊敗打比郡,取得英超席位,睇嚟泰利真係食住林柏特,唔知佢今次能否協助維拉擊敗埋車仔呢?
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。