車仔後防連環派膠 愛華頓贏波大翻身

20191207
東網電視
更多新聞短片
(Getty Images)
車路士後防連環派膠,造就愛華頓大打翻身仗,看守領隊鄧肯費格遜堅好腳頭!周六英超早場愛華頓主場迎戰車路士,上輪大敗予利物浦炒咗領隊馬高施華嘅主隊,一開波就踢出無限鬥心,搶到車仔有氣冇掟抖,換邊後更先後有葛特蘇馬同門將阿列沙巴拿加先後出錯送禮,主隊前鋒卡維特利雲梅開二度,協助拖肥3:1爆冷殺敗車仔。
愛華頓賽前聯賽3連敗,跌到落尾3位置決定換帥,暫由前射手鄧肯費格遜領軍。呢名長人中鋒不嬲粗枝大葉,去到做領隊亦明顯打道氣,但喺佢激勵下成班波士氣高昂,5分鐘薛迪比右路大腳斬中,李察利臣飛將軍上身頂入,領先1:0。
愛華頓開紀錄後踢得更積極,禾確特兩番於右路搞搞震,令車仔門前風聲鶴唳。但車仔畢竟有質素,企穩陣腳下開始反擊,26分鐘韋利安右腳出靚波去近柱,阿巴謙飛身一撐柱邊出界,38分鐘普列錫禁區頂妙傳直線,蒙特左腳一射被敵衞閂走。2分鐘後普列錫左路勁靚壓落底線傳中,韋利安睇怕一篤就入,但畀卡斯迪治尼快一步鏟走個波,半場主隊領先1球。
換邊後4分鐘主隊擴大比數,蘇馬2次解圍都唔清唔楚,終畀卡維特利雲偷甩輕鬆射入,贏到2:0。52分鐘車仔追番粒,左路底線傳中,愛華頓守衞解圍不遠到禁區邊,高華錫第一時間抽入。之後車仔連番埋門,可惜蒙特2次埋門都唔入,艾斯派古達近射又畀比克福特神救。83分鐘輪到阿列沙巴拿加派膠,毫無壓力下將個波交咗畀禾確特,卡維特利雲後腳交畀湯姆戴維斯,混戰下卡維特利雲射穿阿列沙巴拿加大細龍門,開心到鄧肯費格遜跳起。最終愛華頓贏3:1止血,車仔就近4聯賽輸3場。
立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。