【有片】「孫拿度」1扭8　英超史上最靚金球

熱刺前晚主場5比0大炒般尼，南韓前鋒孫興民射入英超史上最精彩入球之一，佢喺32分鐘後場開始狂推超過半場，期間避過8名般尼球員射入，神級入波即時成為球壇熱話，英格蘭傳奇前鋒連尼加表示：「嘩！孫興民射入我見過最偉大嘅個人表演式入波，個人認為拎硬今季最佳入球。」唔少網民都話，孫興民呢個直頭係英超史上最精彩入波，足以超越朗尼2011年嘅完美倒掛，以及柏金喺01/02球季嘅180度轉身金球。

熱刺領隊摩連奴賽後亦向孫興民作出最高讚賞，將佢同「扭波王」朗拿度相提並論：「孫興民未入呢球波之前，我個仔已經叫佢做『孫拿度』(Sonaldo)，今場波佢真真正正做咗『孫拿度』，唯一可以同呢球波相比，係我有幸做卜比笠臣助手嗰陣(巴塞隆拿時代)，見過朗拿度入類似嘅入波。」

歐洲傳媒都大讚呢個跑動距離達70米嘅金球，足球統計網站《Husko Ad.com》仲畀孫興民9.3分高評分，僅次於隊友哈利卡尼。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。