84分鐘失守　車路士近5場4負前4危

車路士聯賽又甩轆，周六晚主場迎戰般尼茅夫，攻足全場都未能攻破對方大門，更於末段遭客軍偷襲得手，最終輸0比1，車路士近5場聯賽輸4場，雖仍以29分排第4，但優勢所餘無幾，林柏特要諗諗計。

車路士今仗圍攻對手，全場18射5中，當中不乏必入機會，上半場譚美阿巴謙就浪費兩次埋門時機，最離譜一次係下半場72分鐘，一輪門前混戰，艾馬臣柏美尼門前4碼頭槌勁頂，可惜欠缺角度，被客軍門將蘭斯達爾擋出，蘭斯達爾踢到上晒身，車路士一眾攻擊球員只能望門興嘆。

般尼茅夫大難不死，84分鐘一次角球混戰偷襲得手，丹高士寧接應隊友高波吊入禁區，突破越位在門前6碼背對龍門挑射，皮球笠過門將阿列沙巴拿加，艾斯派古達門前救駕得來遲一步，波球越過白界入網，經VAR確認入球有效，般尼茅夫領先1比0。

車路士失波後加強搶攻，可惜連同5分鐘補時都追唔番，最終車路士主場輸0比1，聯賽第4位置已告動搖，受到曼聯及熱刺威脅。