【東體爭議】朴智星勁定係孫興民醒?

20191226
東網電視
更多新聞短片
朴智星勁定孫興民勁啲?對於韓國呢種近似張飛同岳飛邊個好打啲嘅網上熱話,謙遜嘅朴智星主動認低威,話自己唔及「民仔」。
收山之後,朴智星除咗擔任曼聯宣傳大使,仲成立咗個JS Foundation支援體育成績出眾嘅學生,過去7年間,就使咗2.1億韓圜(約140.4萬港元)援助203名學生。早幾日,「星仔」以理事長身分主持典禮,向本年度24名得獎學生頒贈獎學金,仲對有志向體育發展嘅學生傳授經驗:「大家要識得咁去諗,就係我一切都要做到最好,唔放棄夢想,因為我係一個才華橫溢嘅運動員。」
隨後就有記者問佢點樣睇「朴孫大戰」,一個中場同一個前鋒點比較好呢?朴智星笑住咁答:「我依家好尷尬,如果你達到孫興民嘅水平,就唔應該攞我嚟比較。英超聯賽嘅水準、影響力愈嚟愈大,呢個就係孫興民技術愈嚟愈好嘅原因。喺當前情況下,根本無法比較。」「星仔」對呢位後輩讚不絕口,仲話係代表住韓國球員以至亞洲球員嘅最大勝利,象徵住亞洲足球影響力愈嚟愈大。
當有媒體問到熱剌如果對住曼聯,朴智星會支持邊一邊?「星仔」答得好有技巧:「我係唔會支持熱剌嘅,但係會支持孫興民,球隊我梗係撐曼聯啦。」咁即係點?