皇馬育成手冊　久保建英下一站呢度

西甲打咗接近半季，馬略卡得15分排尾四，降班危機唔細，日本18歲新星久保建英會唔會跟埋佢哋跌落去西乙呢？唔使擔心！事關皇家馬德里已經為佢鋪定後路，下季會將「Take」轉借皇家蘇斯達！

西班牙報章《diario Mardista》報道，久保建英喺馬略卡踢咗15場，雖然只得1球斬獲，但係整體表現確有進步，皇馬方面非常滿意，於是着手策畫下一步育成計畫，就係將佢外借畀皇家蘇斯達。 皇家馬德里認為皇蘇係令久保建英「進一步提升水準嘅理想球隊」，但係傳媒覺得呢單交易，同兩會會長交情匪淺有關，即係皇馬明醒皇蘇喎。

事實上，今季喺皇蘇大放異彩嘅中場馬田奧迪加特，就係皇馬嘅借將，有個成功先例，自然希望食住上，又睇吓今次會唔會一家便宜兩家着啦。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。