中國媒體解凍阿仙奴　評述員點對奧斯爾？

阿仙奴中場奧斯爾早前發表支持新疆維吾爾族人嘅言論，隨即被中國媒體封殺，風波出現後央視至今仍未播過阿仙奴嘅比賽，不過內地網上直播平台PPTV就出奇招，令佢哋復播阿仙奴嘅比賽之餘，仍然可以將奧斯爾消失。

其實阿仙奴早前對愛華頓一仗，PPTV已經恢復直播，不過呢場波奧斯爾冇份參與，有傳中國媒體威脅只有奧斯爾冇份嘅比賽，佢哋先至會進行直播。阿仙奴上場作客般尼茅夫，奧斯爾以正選身份上陣，不過PPTV仍然直播，但評述員就巧妙咁全場唔提奧斯爾個名，好似讀出場陣容嗰陣，評述員讀晒阿仙奴10個正選球員名，唯獨「睇唔到」奧斯爾，就連奧斯爾尾段被換出，評述員一樣唔提佢個名，唔講以為阿仙奴全場都係10人應戰呀！