贏完些路迪　謝拉特有幾激動？

蘇超最激打吡戰，些路迪主場迎戰格拉斯哥流浪，格流作客打出超水準，雖然一度被扳平，但最後再入1球贏2:1完場，依家只落後死敵2分但打少1場，換句話講失少1分。格流近9年都冇辦法作客贏到些路迪，呢次一吐烏氣，領隊謝拉特點會唔激動先！

呢位利物浦神奇隊長，一向都以熱血見稱，之前帶隊作客奧脫福，試過入完波就咀向鏡頭，唔少球迷都應該記憶猶新；今仗大戰吹完場雞後，謝拉特就好似當初做球員咁，走入場向住作客球迷振臂狂叫，之後轉身見到個鏡頭，仲即刻推開佢，睇到謝老四個心情係幾咁振奮同激動。利迷見到神奇隊長呢個表情，肯定覺得好熟悉；除咗戥佢開心外，亦慶幸謝拉特似乎係個好領隊，唔少利迷都喺網上話，等佢儲夠經驗，未來就返晏菲路接高普班，以另一個身份完成英超捧盃夢。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。