曼聯增兵Plan B啟動 超新星有肥安開光

20191231
東網電視
更多新聞短片
(Getty Images)
即睇卡維特利雲有幾勁:https://bit.ly/2MKaD9i 
英超曼聯喺冬季轉會市場增兵,日前慘受打擊,一直志在必得嘅目標前鋒艾寧夏蘭特,最終選擇加盟多蒙特,而無緣奧脫福。究竟點解臨門撻Q,真相暫時冇人知,不過即將踏入新一年,最緊要都係向前望,英國傳媒就話曼聯主帥蘇斯克查已經啟動Plan B,就係收購艾寧夏蘭特嘅代替品,效力愛華頓嘅22歲英格蘭超新星前鋒卡維特利雲,轉會費至少要5,000萬鎊!
要講愛華頓前鋒,大家第一時間想起可能係巴西22歲射手李索利臣,又或者係意大利水貨摩斯堅恩,不過查實近排「拖肥糖」最具人氣前鋒,應該係呢位卡維特利雲先真。出身自錫菲聯青訓嘅卡維特利雲,2016年加盟愛華頓,曾經入選英格蘭小國腳幫手贏得U20世界盃冠軍,絕對唔嘢少。佢今季喺愛華頓正選上陣13場,已經入咗8球,另加聯賽盃2粒,尤其係新帥安察洛堤上任之後,佢好似畀「肥安」「開光」一樣,近兩場就入3球,幫「肥安」取得兩連勝,難怪連安帥本人都對佢讚不絕口。
「肥安」喺卡維特利雲梅開二度射爆紐卡素賽後話:「喺我個人意見,佢係個超勁嘅前鋒,勁在佢個頭槌,同時喺禁區之內勁聰明同靈活。不過,佢都仲好後生,所以必須繼續改進。佢係個謙虛嘅人,唔太講嘢。我相信佢會成為英格蘭同歐洲最頂級前鋒,佢擁有成為頂級射手嘅一切特質。」
查實,卡維特利雲同愛華頓仲有3年合約,目前估計身價就達到5,000萬鎊,之前安察洛堤都講過,自己仲教緊拿玻里嗰陣已經好欣賞呢位英格蘭新星,加上「拖肥糖」個伊朗富豪老闆又唔等錢使,估計「紅魔鬼」想買人都絕對唔易。不過考慮到曼聯啱啱錯失咗艾寧夏蘭特,而卡維特利雲又冇話身邊有吸血鬼經理人,相信如果曼聯肯適量加碼,呢個Plan B都一樣有機會實現。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。