阿仙奴進入「阿迪達時代」只係3場波，德國中場奧斯爾毫無疑問係改變最大嘅球員，呢位「懶惰天才」一直被視為球隊負累，不過對上2場波已經見佢不惜氣力咁去追人、防守，今場對曼聯更加錄得「奇迹」一樣嘅數據！奧斯爾今場跑動距離高達11.53公里，係阿仙奴全隊最多，全場亦僅次於費特洛迪古斯(11.71公里)。而且奧斯爾更錄得10次重奪控球權，數據亦係全場最高(哈利馬古尼9次排第2)，真係匪夷所思！

奧斯爾已經唔係以往負責交出致命一腳嘅「助攻王」，反而係球隊發起攻勢嘅起動機，擔任連繫中前場嘅樞紐角色，長期處於進攻位置嘅佢仍有85.7%傳球成功率，最重要係奧斯爾似乎並唔介意，為電視台做評述嘅曼聯名宿里奧費迪南就話：「阿迪達嘅思維令阿仙奴耳目一新，完場後阿迪達走入球場，我18個月以來第1次見到奧斯爾笑得咁開心，佢好享受比賽。」