【東體爭議】英超第1水貨──尼當比利

邊個係今季英超第1大水貨？阿仙奴有7,200萬鎊簽入嘅尼高拉斯比比曾經呼聲最高，不過隨住近期翻生表現，成功贏到唔少球迷嘅心，反而熱刺用6,500萬鎊買入嘅法國中場尼當比利，呢排完全係「迷失倫敦」，上場聯賽再度受傷之後，連摩連奴都忍唔住埋怨：「佢成日都受傷」，唔少熱刺球迷都覺得球會「入錯貨」。

尼當比利上季喺里昂踢到曉飛，體形壯健兼有腳法「睇落」好啱英超，不過佢加盟之後斷斷續續受到傷患困擾，至今只係10次喺英超正選上陣，自摩連奴上任之後更加只係踢過3場正選(所有賽事)。喺摩連奴4-2-3-1陣式入面，佢同穆沙施素高、艾歷迪亞、哈利雲克斯爭奪2個正選席位，而尼當比利排名似乎係最低嗰位。

摩連奴早前已經不滿尼當比利喺冇受傷情況下自稱「唔適合比賽」，點知上場聯賽復出只係踢25分鐘就真係受傷，而且唔知要抖幾耐。要知道摩連奴一向鐵腕治軍，唔聽話或者做唔到佢要求嘅球員一律冇運行，熱刺呢6,500萬鎊轉會費都幾牙煙！