占士米拿疑「重傷」　高普想買呢件救亡

利物浦喺足總盃踢走愛華頓，一眾小將同新兵南野拓實都有好表現，不過佢哋今場都有壞消息，老將占士米拿開波9分鐘就懷疑拉傷大腿要退下火線，領隊高普賽後更指占士米拿傷勢「嚴重」，消息指利物浦已經睇中一名荷甲左閘救亡。

占士米拿係利物浦通天老倌，中後場多個位置都可以勝任，34歲嘅佢仍然踢出極高水平。今次受傷，高普賽後表示：「占士米拿同祖高美斯都有踢上場聯賽，結果1個受傷，呢個情況解釋到點解咁多球隊選擇輪換，呢個唔關足總盃事，而係賽程問題。占士米拿受傷後感到痛楚，證明傷勢好嚴重，佢嘅肌肉出咗問題。」

占士米拿原本係左閘安德魯羅拔臣第1替補，佢受傷後利物浦急需搵人頂上，英國《太陽報》指維迪斯左閘麥斯奇勒被高普睇中，呢位英格蘭球星喺2018年進軍荷甲前效力侯城，當時佢正正就係安德魯羅拔臣嘅隊友，而且轉會費只係100萬鎊。