利物浦3大猛將復出　煮死摩連奴

英超1哥利物浦，今輪聯賽將作客熱刺，陣營傳來好消息，中場大將法賓奴泰華利斯、中堅祖爾麥迪比同矮腳虎梳頓沙基利已經復操，對前中後場調動大有幫助，再加埋日本鋒將南野拓實加入，紅軍可謂如虎添翼。相反熱刺有王牌哈利卡尼養傷缺陣，要終止3場不勝極有難度。

利物浦捱過12月魔鬼賽程，球隊可以冇咁辛苦，再加上傷將陸續復出，對爭逐史上首個英超冠軍好有幫助。球隊必然正選、首席防中法賓奴11月起受傷，目前已傷愈復操，麥迪比更於10月開始養傷，領隊高普有番佢哋2個梗係開心。法賓奴同麥迪比剛傷愈，相信今輪大戰未必會正選出場，但利物浦班波本身已好攰，多2名大將隨時頂上，對紅軍幫助極大。