【東體爭議】迪基亞回塘 曼聯應重用軒仔

20200110
東網電視
更多新聞短片
(Getty Images)
曼聯近年後防線表現備受批評,即使今季以天價簽入中堅哈利馬古尼,亦唔見大改善,甚至連一向穩健嘅門將迪基亞水準都走下坡,上月對住當時包尾嘅屈福特,竟然「派膠」連累球隊輸波。
所以有輿論認為呢位29歲西班牙國腳已經回塘,甚至有傳曼聯領隊蘇斯克查有意收回外借畀錫菲聯嘅甸恩軒達臣,取代迪基亞把關。
迪基亞已經效力曼聯9季,4年前幾乎轉投皇馬,隨住成魔時間愈嚟愈耐,加上曼聯近年成績欠佳,令佢意興闌珊,今季幾經波折之下先至續約,但留住佢嘅人,留唔住佢嘅心,「迪迪仔」鬥心明顯不復當年。
因此,蘇斯克查想用甸恩軒達臣取代迪基亞,其實有道理,首先呢位22歲英格蘭小國腳比迪基亞年輕7年,仲有大把進步空間,亦符合年輕化方針。
其次,甸恩軒達臣未經歷過費格遜執教時期,捧盃捧到手軟嘅年代,佢對爭冠嘅饑渴感,一定強過迪基亞。
第三,迪基亞已經佔據曼聯正選門將9季,如果甸恩軒達臣可以取代佢,實屬難得嘅成就,相信佢到時會更加有榮譽感,專心為曼聯賣命。
事實上,甸恩軒達臣今季表現更勝迪基亞,英超上陣20場有7場保持不失球,迪基亞上陣21場只有3場不失球。
甸恩軒達臣撲球成功率有75.53%,亦高過迪基亞嘅68.75%,的確有足夠實力取代後者。
曼聯可以趁迪基亞現時仍然值錢,將佢出售,然後重用甸恩軒達臣,仲可以用賣走迪基亞嘅轉會費簽入新兵,一舉多得。
東網體育FB同你追實體壇每個精彩時刻!
Follow東網體育IG一齊撐本地運動員!