【搞掂VVD】拿玻里勁人　勢投英超勁旅

拿玻里好波之人、比利時國腳梅頓斯，近年一直盛傳會空降英超搵食，相信終於成真，將於今夏以自由身轉會車路士。據《Le10Sport 》報道，梅頓斯效力拿玻里7年後意欲離隊，希望於職業生涯完結前得到一張肥約，車路士領隊林柏特睇中佢可以免費轉會，現時已派員同梅頓斯傾季尾加盟。

今年32歲嘅梅頓斯本身踢開翼鋒，但近年轉踢「假9」前鋒，屬拿玻里前線主力。呢名身高僅得1米69嘅矮腳虎踢法刁鑽，係頭腦靈活嘅老波骨，早前歐聯分組賽對利物浦，就陰濕楔低華基爾雲迪積克，隨後高速壓入禁區射爆紅軍大門。梅頓斯曾出席14同18年世界盃，以及16年歐國盃決賽周，擁有86頂喼帽並射入18球。

車路士今年搞青春班，但一味用後生仔並不上算，林伯希望引入具經驗球員以作平衡，梅頓斯速度飛快大把貨賣，踢法啱晒車仔。據知除車路士外，國際米蘭亦希望免費得到梅頓斯，今夏林伯將要同前車仔主帥干地拗手瓜。