2‧23激鬥恩尼斯達 三浦知良:剝佢條褲

2020年01月11日 21:00
東網電視
更多新聞短片
奧運年日職2月下旬先開打,但係隨住三浦知良星期六(11日)同回升J1嘅FC橫濱續約,肯定創出第35年出戰職業賽嘅紀錄,球迷嘅焦點集中咗喺2月23日FC橫濱作客神戶勝利船場波,因為到時大家可能欣賞到52歲嘅三浦知良同35歲嘅恩尼斯達,合演一場「87歲高齡剝褲大戰」!
FC橫濱為咗隆重其事,專登喺11日上午11時11分宣布同身穿11號球衣嘅三浦續約,2月26日就滿53歳嘅「King Kazu」,13個球季後回歸日職,必然會改寫J1最年長出場紀錄,唯一懸念係對神戶場開鑼戰,佢有冇份踢正選,同埋幾時會創造埋J1最年長入波紀錄啫。
兩個月前,FC橫濱仲為升班努力緊嗰陣,三浦知良已經話非常期待同「小白」交手,而且放言「我要扯甩恩尼斯達條褲」。今次機會嚟嘞,三浦知良自然會格外珍惜,近日佢就自費去咗關島進行個人特訓,日練3課,每朝5點40分就開始軀幹訓練,上晝做有球練習,下晝再操一課,連續催谷兩個星期。唔講唔知,三浦已經係第17年自發去關島特訓,呢種專業精神真係世上難求,抵佢踢到50幾歲仲有班落。
東網體育FB同你追實體壇每個精彩時刻!
Follow東網體育IG一齊撐本地運動員!