走甩紅牌贏爭議波　紅軍係咪大晒？

利物浦今輪作客熱刺，上半場表現唔錯，但羅拔圖法明奴入波前嘅一個界外球，係咪應判畀紅軍極具爭議，若旁證判係熱刺波，就冇可能出現呢個入球；下半場利物浦畀主隊壓到有氣冇碇抖，左閘安德魯羅拔臣踢到躁晒多次唔收腳，其中一次鞋底踩中對手，球證走漏眼睇唔到，唔少球迷賽後，都認為羅拔臣應該領紅出場。

上半場37分鐘，利物浦於左路發難，沙迪奧文尼同奧利亞於邊線一拍個波出咗橫邊，出界前雙方都有掂到皮球，但旁證就畀咗利物浦波，搞到奧利亞嬲爆大叫。利物浦掟波入場區，就造就法明奴禁區內狂抽入網，如果當時判係熱刺波，今場戰果或會改寫。

下半場熱刺埋門多過對手，球隊中前場搶截好有效，搞到羅拔臣都躁躁哋，一次左路落底進攻，羅拔臣自己控甩腳後即時飛剷，雖然先中個波，但其後熱刺小將坦根加食正羅拔臣鞋底餅，因為發生於電光火石之間，球證艾堅遜睇唔到。若利物浦當時打少1個，最後未必可以全取3分。羅拔臣呢次踩中對手，同同日頭場阿仙奴隊長奧巴美揚犯規類似，但一個紅牌、一個牌都冇，堅係同人唔同命。