利物浦21戰61分　5大聯賽史上最勁！

利物浦今輪作客熱刺贏得驚險，靠羅拔圖法明奴上半場抽爆網，全場贏1:0再次贏波，本季21場聯賽20勝1和，由於同日李斯特城輸波、曼城又於周日深夜先出場，領先狐狸16分仲少打1場，爭勢形勢好到不能再好。

利物浦再贏1場，又再創2項紀錄。今季開季21戰攞61分，係歐洲球壇5大聯賽採取贏波3分制以來，21戰以後取得嘅最高分數，簡直係史無前例；另外利物浦近38場聯賽取得33勝5和成績，累積攞到104分，係英超成立以來，38場聯賽之後攞得嘅最高分數，打破18年曼城，以05年車路士取得嘅102分紀錄。