【阿King】2次助攻!桑馬達係曼聯真核心

20200112
東網電視
更多新聞短片
(Getty Images)
曼聯喺周六(11日)晚英超以4:0大勝諾域治,踏入2020年終於開齋,亦係紅魔鬼自開鑼戰炒車路士4蛋後,今季英超最大勝仗。
曼聯球迷最開心嘅事,唔止因為球隊贏得漂亮,仲見到領隊蘇斯克查終於覺醒,棄用「零貢獻」連格,並由桑馬達擔正。呢位31歲西班牙老將貢獻2次助攻,盡顯中場核心本色,曼聯下半季要爭入英超前4位,真係靠晒佢。
連格已經超過1年未曾喺英超入波或助攻,因而被網民寸係「零格」,紛紛要求球會踢走佢,連一直偏愛佢嘅蘇斯克查都頂唔順,今場終於棄用佢。
桑馬達亦以行動證明自己,先至係曼聯最需要嘅中場創造者,其中第1個入球,佢恰到好處嘅長傳,造就拉舒福特近門建功,堪稱一絕,令人諗起以往碧咸嘅「七旋斬」。
曼聯今季最大弱點,就係缺少1位創造型中場,所以一直傳要簽基斯甸艾歷臣,但其實桑馬達都有能力做好呢個角色,希望經此一役後,蘇斯克查可以好好信任呢位忠臣。
東網體育FB同你追實體壇每個精彩時刻!
Follow東網體育IG一齊撐本地運動員!