摩佬第一簽　賓菲加天才畀面加盟

搞掂體測喇！根據英國《天空體育》報道，效力葡超賓菲加嘅21歲天才中場謝特臣費南迪斯，經已完成體測，日內會以先借後買形式加盟英超熱刺！據知，今次借用期為18個月，然後熱刺有優先權以5,600萬歐元將佢買斷。至於熱刺今次搶贏韋斯咸簽得呢位葡萄牙新星，其中一個原因係謝特臣想跟同鄉名帥摩連奴搵食學習。

上季被提升上賓菲加一隊嘅謝特臣費南迪斯，今季共為球隊上陣13次，之前佢入選過葡萄牙各級別青年軍代表隊，亦曾為成年國家隊披甲兩次。謝特臣本身合約違約金高達1.02億鎊，由於佢今季同主帥格拉出現矛盾，失去主力位置，所以離隊係難以避免，而賓菲加因此都願意降低對佢嘅轉會費要求。

熱刺方面，由於穆沙施素高因傷休戰三個月，尼當比利亦係養傷當中，加上基斯甸艾歷臣亦快將離隊，盧施素又未完全適應英超，因此主帥摩連奴急欲為中場增兵，而喺球會資金不足之下，依家嘅先借後買方案自然最合熱刺管理層心水。