唔講你唔知！法明奴今季過癮入波軌跡

利物浦領隊高普曾經講過，於埃及文明當中，沙迪奧文尼及穆罕默德沙拿，可以係世界級，但唔係每場都係，但羅拔圖法明奴就場場都有世界級表現，反映高普有幾咁器重呢名巴西前鋒。但若以入球嚟做標準，法明奴可謂客場誇啦啦、主場係冬瓜，今季7個英超入球全部來自客戰，聯賽仲未試過喺晏菲路入波！

本季英超作客修咸頓、車路士同水晶宮，法明奴都射入奠定勝局嘅入球，近期鬥勁敵李斯特城又梅開二度，上場英超剛一箭定江山力挫熱刺。另外世界冠軍球會盃，4強賽事完場入致勝球，決賽對法林明高，法明奴更於加時階段射入「奪標金球」，法明奴對利物浦當然重要。

但本季踢咗超過一半，法明奴卻無法喺主場取得英超入波，歐聯亦未喺晏菲路建功，名宿艾德列治就話佢係奇葩：「佢於客場勁有信心，踢落好醒神，但於主場就不時心事重重，好似唔夠信心。大家都知法明奴係高普愛將，而且經驗豐富，所以佢唔夠信心就更加唔合理。但剛啱鬥熱刺佢射入靚波，呢個入球反映佢信心爆棚，但如果呢個入球機會出現於主場，我都唔知佢入唔入到。」