軒達臣做英格蘭一哥 全靠紅軍效應

2020年01月15日 14:02
東網電視
更多新聞短片
(Getty Images)
利物浦再一下城,隊長佐敦軒達臣力壓史達寧同哈利卡尼,當選2019年英格蘭最佳球員,呢位29歲中場過去1年為英格蘭上陣7次,當中上年3月對黑山,獲得第50頂「喼帽」,並協助英格蘭打入歐國盃決賽周。
呢個獎由球迷投票選出,頒畀每年喺英格蘭國家隊表現最佳嘅球員,之前2年都由哈利卡尼獲得。
論2019年國際賽表現,曼城翼鋒史達寧同哈利卡尼更搶眼,其中史達寧上年為英格蘭上陣9場入8球,哈利卡尼更加上陣10場入12球,但最後都係不敵佐敦軒達臣。
講到尾都係「紅軍效應」太強勁,利物浦上季以97分「超高分」屈居英超亞軍,獲得嘅好評甚至更勝冠軍曼城,而且仲得到唔少同情分。
利物浦上年亦捧咗歐聯及世冠盃,加上自上年1月4日不敵曼城後,一直保持英超不敗,所以即使佐敦軒達臣喺國家隊入波同上陣數字都唔及史達寧同哈利卡尼,仍然可以喺「紅軍效應」支持下,當選2019年英格蘭最佳球員。
東網體育FB同你追實體壇每個精彩時刻!
Follow東網體育IG一齊撐本地運動員!