巨星之路!小豌豆等去銀河替伊巴謙

2020年01月15日 17:02
東網電視
更多新聞短片
(Getty Images)
伊巴謙莫域上季美職結束後,離開洛杉磯銀河,日前更重返AC米蘭。銀河為延續「星戰策略」,計劃簽入1位星級前鋒接替伊巴謙莫域,球會總經理高爾斯透露,頭號目標係前曼聯射手查維亞靴南迪斯。
高爾斯話:「會方將盡最大努力,爭取簽入查維亞靴南迪斯,呢單交易對銀河非常有利。」31歲嘅查維亞靴南迪斯2010年夏天由瓜達拉哈拉加盟曼聯,頭3季英超入波都達到雙位數,成為紅魔鬼最重要嘅後備殺手。
不過,呢位綽號「小豌豆」嘅墨西哥國腳之後表現無以為繼,曾被外借去皇馬1季,之後轉投利華古遜,過去3季效力韋斯咸亦表現平平,今季加盟西維爾,但唔見有起色,9次聯賽上陣只入1球。
雖然查維亞靴南迪斯唔想離開西維爾,但由於佢希望有更多上陣時間,最終可能會答應加盟洛杉磯銀河。
洛杉磯銀河以往簽入唔少球星,包括碧咸、羅比堅尼、艾殊利高爾、伊巴謙莫域,查維亞靴南迪斯加盟銀河,都係一種球星「身份象徵」。
東網體育FB同你追實體壇每個精彩時刻!
Follow東網體育IG一齊撐本地運動員!