【有片】43歲托迪 超靚零角度扯西罰球!

2020年01月15日 19:00
東網電視
更多新聞短片
右腳腳面拉弓,零角度扯外西直飛死角,淨係睇文字已經夠興奮啦,睇埋片真係嘩嘩聲!意大利、羅馬經典名宿托迪,雖然已經43歲並已掛靴超過2年,但除咗身型仲係保持得勁好之外,射術依然係一等一。最近佢組隊踢素人聯賽,於右邊邊線處理罰球,正常必定係斬入禁區,但佢就射出超高難度入球,難怪場邊球員睇到彈晒起身!
有番咁上下波齡嘅球迷,肯定對托迪非常熟悉。呢名羅馬One Club Man,於呢間首都球會效力足足30年,於各項賽事上陣786次、射入307球,並為意大利贏得2006年世界盃冠軍,01年亦協助羅馬取得意甲錦標。呢名型足一世嘅球星,踢法瀟灑埋門把握力一流,04/05球季曾經得到皇馬垂青希望重金將佢買入,仲留咗件10號波衫畀佢,但因為佢忠於羅馬,所以拒絕上艦,又好波又忠心,喺依家球壇都好難搵到第2個。