【賽後解碼】桑馬達證明曼聯最需要乜嘢

曼聯喺足總盃第3圈重賽1比0小勝狼隊，整體表現未見突出，不過老將桑馬達嘅關鍵一擊就帶領球隊晉級。繼上場聯賽交出2次助攻，桑馬達自上年10月以來首次連續擔任正選繼續有好表現，用行動話畀曼聯知，一個好嘅創造型中場可以帶嚟乜嘢改變，今個月內收購波基斯費南迪斯唔可以再猶豫。

蘇斯克查讚賞連格嘅跑動能力同無球走位，桑馬達就有廣闊球場視野同交波能力，但作為一個攻擊型中場，入球數字明顯偏低，今場入波只係桑馬達今季各項賽事第2球，連格嘅「入球零貢獻」更加係深入民心。

波基斯費南迪斯上季葡超狂入20球，今季15場聯賽亦入8球，無論射門、助攻、扭波都係「強化版桑馬達」，近2場比賽睇到桑馬達在陣對曼聯進攻嘅重要性，如果換成波基斯費南迪斯，效果肯定會更加理想。冬季轉會窗仲有唔夠半個月，曼聯應該識得點做。