下一站...普多斯基竟然去呢度！

唔同日職神戶勝利船續約，又唔係去波蘭搵食，普多斯基仲會去邊？答案可能令好多人O嘴，傳聞34歲嘅佢，可能加盟馬來西亞豪門柔佛DT，而且仲有機會喺今年亞冠盃倒戈挑戰神戶添！

呢單係咪吹水，睇落又唔多似，因為馬超6連霸勁旅柔佛DT，星期三（15日）喺官方FB上載普多斯基造訪佢哋個主場同練習場嘅圖片，馬來西亞傳媒亦話呢位「科隆王子」好有興趣跳槽，仲同柔佛DT高層傾過偈咁話。

早前有聲氣話，神戶要求普多斯基減薪留多半年，認真侮辱。佢今次突然出現喺柔佛DT，唔知係咪部署報仇，事關神戶勝利船喺2月中開打嘅亞冠盃分組賽，G組揭幕戰就係主場出戰柔佛DT，普多斯基似乎真係有啲嘢喎。