利物浦破紀錄1.07億鎊收購 唔會死錯人!

2020年01月16日 12:00
東網電視
更多新聞短片
世界冠軍利物浦喺轉會市場忍手多時,近日有消息話「紅軍」正準備一宗驚天收購,領隊高普睇中利華古遜天才中場夏維斯,準備出動破球會轉會費紀錄嘅1.07億英鎊(約11億港元)搶人,據報利物浦已經同夏維斯經理人接洽,希望喺今個夏天完成呢宗夢幻轉會。
現年20歲嘅夏維斯踢法全面,可以勝任中場多個位置,上季德甲17個入波令佢成為全歐洲炙手可熱新星,今季表現雖然下滑,但超強潛力仍然得到高普信任,英國《每日快報》早前指利物浦已經同夏維斯經理人接觸,西班牙《世界體育報》又指利物浦已經喺呢場爭奪戰「排頭位」。
事實上,荷蘭中場韋拿杜姆已經就嚟30歲,之前亦傳過佢可能季尾離隊,加上拉爾拉拿亦好大機會走人,即使利物浦已經簽入南野拓實,似乎仍有需要再簽一個王牌中場。利物浦買人向來眼光獨到,近年重金收購華基爾雲迪積克、艾利臣比加等都係物超所值,如果利物浦決定重金買夏維斯,相信都唔會死錯人。