小學雞犯錯!奇連士文或被禁領軍

2020年01月16日 14:07
東網電視
更多新聞短片
奇連士文無牌教波?《圖片報》日前獨家爆料, 舊年11月尾再度出山,執教德甲哈化柏林嘅「轟炸機」奇連士文,懷疑未持有效教練牌,可能面臨被罰,甚至無法領軍。
連德國、美國國家隊、拜仁慕尼黑都教過,奇連士文會無牌?講都冇人信。問題係佢啲證書去咗邊呢?佢話11月底飛去柏林時,認為唔需要帶教練執照同培訓證書,因為當時唔知自己會做哈化柏林教頭,結果所有文件都放喺加州屋企某個櫃桶。最麻煩嘅係,佢老婆目前陪個女去咗另一個地方讀書,間屋擺緊空城計,冇人幫到佢。
奇連士文又話:「我有兩三張證書,一張嚟自德國足球聯賽,另一張嚟自其他國家。問題係所有嘢都要由美國寄過嚟。如果未來會有任何呢類培訓課程,我都好願意參加。我覺得呢啲些課程非常有趣,我唔希望受到任何處分。」
德國規定教練牌照必須每過3年,就要接受20小時培訓,然後更新註冊。奇連士文係喺2000年攞到證書,至於過咗期未?依家冇法子證實得到。但係DFB教練學院負責人Tobias Haupt都大讚佢係個好教練,為德國足球做出巨大貢獻,只不過某些規則都適用於佢,一樣要遵守。佢仲話知道近年嚟奇連士文喺墨西哥、巴西等地接受過培訓,之但係呢啲國家不嬲對證書都唔係咁重視。