利物浦成功之謎　法明奴一片破解

利物浦半年內連奪歐聯、歐超盃同世冠盃，可謂勢如破竹，球隊逐個秤絕非當世最強，但紅軍近38場聯賽狂擸104分、本季英超21輪攞61分，破歐洲5大聯賽史上最高分紀錄，利物浦實力毋庸置疑。紅軍究竟點解咁犀利？其中一個最大原因，係球員之間親如兄弟，大家感情好到黐線，絕非只係同事、隊友咁簡單。

前鋒羅拔圖法明奴，近日於自己屋企嘅私人泳池受浸，期間大批親朋戚友在場見證，當中仲包括隊友、巴西同鄉艾利臣比加同法賓奴泰華利斯。受浸時候法明奴除太太陪伴在旁外，艾利臣都喺後面大力支持。當法明奴完成受浸儀式，佢開心到振臂慶祝並攬實老婆，呢個時候艾利臣亦感動到喊咗出嚟。呢個反應冇得扮，唯一解釋係佢2個真係好老友。

其實於利物浦陣中，大家相親相愛唔係新聞，當中穆罕默德沙拿及洛夫蘭，以及佐敦軒達臣同拉爾拉拿都勁好朋友，唔少香港球迷都話佢哋係「一對」添，早前沙迪奧文尼跌爛電話，韋拿杜姆就送咗個新IPhone畀隊友。喺咁和睦嘅氣氛返工，成績梗係好啦！