阿古路接班人曝光！曼城瞄準2大射手

曼城王牌射手阿古路，於上輪英超再度大演帽子戲法，協助藍月亮6:1大炒阿士東維拉。阿古路今仗創出2項紀錄，除超越舒利亞成英超戴帽次數最多球員外，更壓倒亨利成英超史上外籍入球王。但阿古路已經31歲、只餘18個月約，曼城都係時候搵定接班人。

雖然加比爾捷西斯質素不俗，但年紀始終較細較為幼嫩，《曼徹斯特晚報》報道，曼城已經擬定接班人名單，分別係英格蘭隊長、熱刺王牌前鋒哈利卡尼，以及國際米蘭阿根廷射手拿達路馬天尼斯。哈利卡尼實力較受世界肯定，但出道以來從未染指任何冠軍獎盃，令佢非常唔開心，所以曼城招手的話，熱刺都好難留人。而拿達路馬天尼斯本季於國米踢到曉飛，已射入10個意甲入球，巴塞總監艾比度都公開承認，有意搵馬天尼斯頂替蘇亞雷斯，可見佢份量十足。

阿古路曾表示，好想退役前重返阿根廷踢波，曼城方面好尊重呢位傳奇球員，有傳佢哋已向阿古路表示，由佢決定幾時，以及用乜嘢方式離開。