3次One-Two入波!戴巴拿希古恩夢幻金球

2020年01月16日 18:00
東網電視
更多新聞短片
意大利盃16強賽事,祖雲達斯主場對烏甸尼斯,雖然C朗因冷親連後備都做唔到,但有呢2個阿根廷前鋒,邊個仲記得呢位球王?今仗祖記大勝4:0,首個入球就精彩絕倫,保羅戴巴拿同希古恩視對手6個守衞如無物,入波前互交6腳、做咗3次One-Two去到門前,先由希古恩輕鬆射入,簡直好似睇緊足球小將一樣,咁搞法邊個夠你2個玩呀!
戴巴拿及希古恩呢對鋒線殺手,一個幾乎被領隊沙利放棄,一個就曾被借到車路士,都冇乜人睇好佢哋可以繼續為祖雲達斯發光發熱,但2人心靈相通、組成犀利到爆嘅組合。睇番呢個入球,祖雲達斯面對對手全軍退守,要撕破對手防線非常困難,但2人好似手術刀一樣,腳腳交波精準無比,喺人叢間如穿花蝴蝶咁互相傳送,簡直去到藝術品嘅層次。2人摧毀對手成條防線,就好似睇緊《足球小將》戴志偉同麥泰萊入波一樣。
戴巴拿除策動呢次絕妙攻勢外,之後仲梅開二度,當中包括於右路犄角位起左腳射遠柱入網嘅靚波,成為今場贏波英雄。賽後沙利話,今場入場球迷淨係睇球隊首個入球就值回票價,相信未來會多啲搵佢2人正選出場。