【阿King】蘇斯克查犯下最愚蠢錯誤

2020年01月16日 19:01
東網電視
更多新聞短片
(Getty Images)
曼聯喺英足盃第3圈重賽,雖然以1:0淘汰狼隊,但付出沉重代價,拉舒福特後備上陣受傷,好可能缺陣周日(19日)深夜英超「雙紅會」作客利物浦。呢個次打擊其實可以避免,但因為領隊蘇斯克查犯下「腦筋錯誤」而造成。
拉舒福特本身有傷在身,加上嚟緊要鬥利物浦,佢今場先任後備,本來冇錯。不過,蘇斯克查偏偏「屎忽痕」,曼聯同狼隊仲係0:0時,就派佢上陣搏殺,根本係一次「高風險、低回報」嘅賭博。
其實英足盃重要性已經大不如前,就算出局亦唔可惜,但為咗晉級,而要冒險派1位有傷嘅主將上陣,實際十分唔值得。
特別係曼聯今季攻力欠佳情況下,再損失埋拉舒福特,令問題雪上加霜,真係十萬個唔應該。
老實講,如果要喺英足盃同拉舒福特之間,作出選擇,相信大部分紅魔鬼球迷都會揀拉舒福特冇傷冇痛,出戰「雙紅會」,因為對曼聯Fans而言,擊敗利物浦,興奮度一定高過英足盃晉級。而且仲計拉舒福特唔知要養傷幾耐,隨時缺陣更多賽事。
惟獨蘇斯克查唔識諗,隨時搞到因小失大,如果佢將來被炒,今次「愚蠢錯誤」絕對係主因之一。
東網體育FB同你追實體壇每個精彩時刻!
Follow東網體育IG一齊撐本地運動員!