【賽後解碼】摩佬解決唔到卡尼危機

英超周末晚早場由屈福特主場對熱刺，「大黃蜂」曾經喺下半場中段趁熱刺中堅維頓漢禁區犯手球，搏得12碼，可惜主射嘅隊長迪尼主射被救熱刺門將加沙寧加救出。到補時階段，又輪到屈福特新兵普錫圖及時護空門，將熱刺攻門化解，最終雙方互交白卷完場，齊齊失分。

連同今場和波，熱刺已經連續4場聯賽失分，對佢哋爭逐前4絕對係個大打擊。此外，自從佢哋首席球星哈利卡尼受傷收咧之後，已經連續3場聯賽冇波入，似乎係連南韓國腳孫興民都撐唔住，主帥摩連奴根本解決唔到卡尼缺陣嘅危機。唔係講笑，原來今場係熱刺近94場聯賽嘅首場0比0和波，係英超史上第2長嘅紀錄。

至於屈福特呢邊，自從改由尼祖皮雅臣領軍，佢哋係同期英超得分第3多球隊，只係較利物浦同曼城為差，難怪佢哋護級開始見到曙光。