【特稿】「埃及文明」對曼聯超心寒數據

周一(20號)凌晨英超「雙紅會」，利物浦被一致睇好可以擊敗死對頭曼聯，不過「紅軍」想贏波可能就要搵「特別渠道」去入波，事關利物浦向來最煞食嘅「埃及文明」組合，原來對親曼聯都冇啖好食，3個加埋只係入過曼聯1次波咁大把咋！

自從穆罕默德沙拿、沙迪奧文尼同羅拔圖法明奴加盟利物浦後，喺英超對親曼聯都冇運行，法明奴9次聯賽對曼聯仲未入過波，沙拿4次鬥紅魔亦係交白卷，沙迪奧文尼就5鬥曼聯入過1球最叻仔，嗰個入波就係上季主場3比1贏曼聯先開紀錄。

不過，利物浦勝在多人識入波，首循環作客奧脫福就有拉爾拉拿做救世主，上季就有梳頓沙基利末段梅開二度做英雄，唔知今場又有冇意外驚喜呢？