澳洲山火搞亂澳職　前德甲金靴即時劈炮

呢次堅係「焗」住走！澳職西悉尼流浪者官網上周六（18日）證實，漢堡青訓出身嘅前德甲金靴美亞，因為頂唔順澳洲山火帶嚟嘅濃煙，正式同球隊解約返回德國。

37歲嘅美亞喺舊年9月先加盟西悉尼流浪者，踢咗12場波貢獻1球1助攻，係中場主力。呢位曾經效力漢堡、法蘭克福同聖保利嘅攻擊中場，本來已經覺得澳洲夏季高達30度以上嘅炎熱高溫惡頂，依家加埋山火導致空氣惡劣，令佢更難適應，於是選擇提前解約返德，今日（19日）晏晝3點半主場對珀斯光輝場波，已經冇佢份，結果西流亦以0比1敗陣。

咪睇美亞唔係國腳級人馬，佢喺2014–15年球季踢法蘭克福嗰陣，以26戰入19球榮膺德甲神射手，級數有番咁上下。